വിശ്വകായികമേളയ്ക്ക് പാരിസിൽ മിഴി തുറന്നു. ഒരു നൂറ്റാണ്ടിന് ശേഷം ഒളിമ്പിക്സിന് ആതിഥേയത്വം വഹിക്കുന്നതിന്റെ ആവേശത്തിലാണ് പാരിസ് നഗരം. ഉദ്‌ഘാടനച്ചടങ്ങുകൾ ആദ്യമായി സ്‌റ്റേഡിയത്തിന്‌ പുറത്തെത്തിയപ്പോൾ അവിസ്‌മരണീയ കാഴ്‌ചകളുമായി പാരിസ് ലോകത്തെ വിസ്‌മയിപ്പിച്ചു. രാജ്യാതിർത്തികൾ മാഞ്ഞുപോവുകയും ജനത ഒന്നാവുകയും ചെയ്യുന്ന വിശ്വമാനവീകതയുടെയും സൗഹൃദത്തിന്റെയും പോരാട്ടവീറിന്റെയും സംഗമഭൂമിയാണ് ഒളിമ്പിക്സ്.
206 രാജ്യങ്ങളിലെ 10,500 കായികതാരങ്ങൾ വിശ്വവേദിയുടെ അരങ്ങിലെത്തും. 117 അംഗ സംഘമാണ് 2024 ഒളിമ്പിക്സിൽ ഇന്ത്യയ്ക്കായി മത്സരിക്കുന്നത്. പി ആർ ശ്രീജേഷ്, എച്ച് എസ് പ്രണോയി, വൈ. മുഹമ്മദ് അനസ്, വി. മുഹമ്മദ് അജ്മൽ, അമോജ് ജേക്കബ്, മിജോ ചാക്കോ കുര്യൻ, അബ്ദുള്ള അബൂബക്കർ എന്നിവരാണ് ഇന്ത്യൻ സംഘത്തിലെ മലയാളികൾ. ലോകജനതയെ ഇത്രയേറെ ചേർത്തുനിർത്തുന്ന മറ്റൊരു കായികമേളയ്ക്കും ചരിത്രം പിറവിയേകിയിട്ടില്ല. ഈ മഹാ കായികമേളയിൽ മാറ്റുരയ്ക്കുന്ന മുഴുവൻ കായിക പ്രതിഭകൾക്കും വിജയാശംസകൾ.
