ഇഷ്ടപ്പെട്ട തൊഴിൽ നേടാൻ ഉദ്യോഗാർത്ഥികൾക്ക് അവസരമൊരുക്കുകയും സ്വയംസംരംഭങ്ങൾ ആരംഭിക്കാനുള്ള ആഗ്രഹങ്ങൾക്ക് പിന്തുണനൽകുകയും ചെയ്യുന്ന ജോബ് സ്റ്റേഷനുകൾ തളിപ്പറമ്പ് മണ്ഡലത്തിൽ കൂടുതൽ ഇടങ്ങളിൽ ഒരുങ്ങുകയാണ്. സർ സയ്യിദ് കോളേജിൽ കൂടി ആരംഭിച്ചതോടെ മണ്ഡലത്തിലെ 9 തദ്ദേശ സ്ഥാപനങ്ങളിലും ജോബ് സ്റ്റേഷൻ വഴിയുള്ള സേവനങ്ങൾ ലഭ്യമായിത്തുടങ്ങി. തളിപ്പറമ്പ ഇക്കോണമിക് ഡെവലപ്പ്മെന്റ് കൗൺസിലിൻ്റെ എംപ്ലോയ്മെന്റ് ആൻഡ് എന്റർപ്രണർഷിപ്പ് പ്രോജക്ടിന്റെ ഭാഗമായി വിജ്ഞാന തൊഴിൽ- സംരഭക ഫോൺ- ഇൻ ഹെൽപ്പ് ഡെസ്കും വെബ്സൈറ്റും ഉദ്ഘാടനം ചെയ്തു. വിജ്ഞാന സമൂഹമായി അതിവേഗം പരിണമിക്കുന്ന കേരളത്തിൽ വൈജ്ഞാനിക മേഖലകളെ അടിസ്ഥാനമാക്കി പുതിയ ധാരാളം സ്ഥാപനങ്ങളും തൊഴിൽ സാധ്യതകളും ഉയർന്നു വരുന്നുണ്ട്. പഠനം പൂർത്തിയാക്കി പുറത്തിറങ്ങുന്ന ഉദ്യോഗാർത്ഥികൾക്ക് അനിയോജ്യമായ തൊഴിൽ ലഭിക്കുക എന്നതും വളരെ പ്രധാനമാണ്. എല്ലാവർക്കും അനിയോജ്യമായ തൊഴിൽ ലഭിക്കുന്ന സംരംഭ സൗഹൃദ മണ്ഡലമെന്ന ലക്ഷ്യത്തിലേക്ക് തളിപ്പറമ്പ് ഒരുമിച്ചു മുന്നേറുകയാണ്.
