അപര ജീവിതത്തിന് സ്വജീവിതത്തേക്കാൾ മൂല്യമുണ്ടെന്ന പാഠമാണ് ശ്രീ നാരായണ ഗുരു നമ്മെ പഠിപ്പിച്ചത്. മനുഷ്യരനുഭവിച്ചു പോന്ന സകല ചൂഷണങ്ങളിലും നിന്നുമുള്ള വിമോചന സാധ്യത അദ്ദേഹം നിരന്തരം അന്വേഷിച്ചു. ആ അന്വേഷണം തുടരുന്ന ഈ കാലത്തും ശ്രീ നാരായണ ഗുരുവിന്റെ ജീവിതവും ചിന്തയും ഏറെ പ്രസക്തമാണ്. സംഘടിച്ച്‌ ശക്തരാകുന്നതിനൊപ്പം തന്നെ വിദ്യ കൊണ്ട് പ്രബുദ്ധരാകാനും അദ്ദേഹം ആഹ്വാനം ചെയ്തു. സവർണാധിപത്യത്തിനും അനാചാരങ്ങൾക്കും എതിരെയുള്ള പോരാട്ടമായിരുന്നു ആ ജീവിതം.
ജാതിഭേദവും മതദ്വേഷവുമില്ലാതെ എല്ലാവരും സോദരന്മാരായി വാഴുന്ന മാതൃകാസ്ഥാനമായി നമ്മുടെ കേരളത്തെ എന്നും നമുക്ക് നിലനിർത്താനാകണം. മതനിരപേക്ഷത കാത്തുസൂക്ഷിക്കാനുള്ള പോരാട്ടങ്ങളിൽ ശ്രീനാരായണ ഗുരു അടക്കമുള്ള നവോത്ഥാന നായകരുടെ ജ്വലിക്കുന്ന സ്മരണകളാണ്‌ നമ്മുടെ കരുത്ത്‌. ചരിത്രത്തെ മാറ്റിയെഴുതുകയും ചരിത്ര പുരുഷന്മാരെ പുറത്തു നിർത്തുകയും ചെയ്യാനുള്ള പുതിയ കാലത്തെ ശ്രമങ്ങളെ, ഗുരു ഉയർത്തിയ മനുഷ്യ സ്നേഹം ഉറക്കെ വിളിച്ചു പറഞ്ഞു കൊണ്ട് തന്നെ നമുക്ക് പ്രതിരോധിക്കാം.
ഏവർക്കും ശ്രീനാരായണ ഗുരു ജയന്തി ആശംസകൾ
