സിനിമാ വ്യവസായ മേഖലയില്‍ സ്ത്രീകള്‍ക്കെതിരെ നടക്കുന്ന ചൂഷണങ്ങളെ കുറിച്ച് അന്വേഷിക്കാന്‍ നിയോഗിച്ച ഹേമ കമ്മിറ്റി നല്‍കിയ റിപ്പോര്‍ട്ടിനെ സ്വാഗതം ചെയ്യുന്നു. ഈ രംഗത്ത് നടക്കുന്ന ചൂഷണങ്ങളെ കുറിച്ച് കമ്മിറ്റിയുടെ റിപ്പോര്‍ട്ടില്‍ പറയുന്ന കാര്യങ്ങള്‍ ഞെട്ടിപ്പിക്കുന്നതാണ്. അത്തരം ചൂഷണങ്ങള്‍ അവസാനിപ്പിക്കാനും സിനിമ മേഖലയെ ശുദ്ധീകരിക്കാനും ഹേമ കമ്മിറ്റി റിപ്പോര്‍ട്ട് സഹായകരമാകും. ദുഷിച്ച പ്രവണതകള്‍ ഇല്ലാതാക്കാനും നല്ല വ്യവസായ - തൊഴില്‍ അന്തരീക്ഷം സൃഷ്ടിക്കാനും സാധിക്കണം. അതിനായി സ്വയം വിമര്‍ശനത്തിലൂടെയും ആത്മപരിശോധനയിലൂടെയും കൂട്ടായ പരിശോധനകളിലൂടെയും ചര്‍ച്ചകളിലൂടെയും തെറ്റ് തിരുത്തുകയും തിരുത്തിക്കുകയും ചെയ്യണം.
തെറ്റുകള്‍ മേലില്‍ ആവര്‍ത്തിക്കാതിരിക്കാനും തെറ്റ് ചെയ്യുന്നവര്‍ക്ക് ഭയമുണ്ടാകാനും സ്വയമേവ അതില്‍ നിന്നും പിന്തിരിയാനുമുള്ള അന്തരീക്ഷം ഉണ്ടാക്കണം. അതിനെല്ലാമുള്ള ചുണ്ടുപലകയാകുന്നതാണ് ഈ റിപ്പോര്‍ട്ട്.
