കുറ്റം ചെയ്തില്ലെങ്കിൽ എന്തുവന്നാലും അതിനെ തലയുയർത്തി നേരിടാൻ കഴിയും. പണത്തിന്റെ പിന്നാലെ പോകാനുള്ള ത്വര കാണിച്ചാൽ മനഃസമാധാനം നഷ്ടപ്പെടും. മന്ത്രിസഭയ്ക്കും ഞങ്ങൾക്കെല്ലാവർക്കും ആരുടെ മുന്നിലും തലയുയർത്തി നിൽക്കാൻ കഴിയും. കേരളത്തിൽ വിവിധ മേഖലകളിൽ വലിയ പണം ചെലവിടാൻ വരുന്നവരുണ്ട്. അവർ മറ്റു ചില സംസ്ഥാനങ്ങളിൽ പോകുമ്പോൾ ആദ്യം കമീഷൻ ഉറപ്പിക്കും. അത്തരം കമീഷന്റെ ഏർപ്പാടില്ലാത്ത സംസ്ഥാനമാണ് കേരളം. സേവനം എന്നാൽ ജനങ്ങളെ സേവിക്കലാണ്. ഇക്കാര്യത്തിൽ വഴിവിട്ട നടപടികൾ ഉണ്ടാകരുത്. രാജ്യത്ത് അഴിമതി ഏറ്റവും കുറഞ്ഞ സംസ്ഥാനമെന്ന പേര് കേരളത്തിനുണ്ട്. എന്നാൽ, അതുകൊണ്ട് നാം തൃപ്തരല്ല. ചില തലങ്ങളിലെങ്കിലും അഴിമതിയുണ്ട്. അത് തീർത്തും ഇല്ലാതാക്കണം.
മനുഷ്യന്റെ ആർത്തിയാണ് അഴിമതിക്ക് ഇടയാക്കുന്നതെന്ന് കഴിഞ്ഞ ദിവസം താൻ പറഞ്ഞു. ഇത് ആദ്യമായി പറഞ്ഞതല്ല. കഴിഞ്ഞ ഏഴര വർഷവും പറയുന്ന കാര്യമാണത്. അഴിമതിയുടെ കാര്യം വരുമ്പോൾ ഈ മന്ത്രിസഭയ്ക്കും ഞങ്ങൾക്കെല്ലാവർക്കും ആരുടെ മുന്നിലും തല കുനിക്കേണ്ടി വരില്ല. ഈ അവസ്ഥ എല്ലാവർക്കും ഉണ്ടാക്കാനാകണം. ഇതാണ് ആർത്തിയെക്കുറിച്ച് പ്രതികരിക്കാൻ തയ്യാറായവരോട് പറയാനുള്ളത്.
