പലസ്തീന് ഐക്യദാര്ഢ്യത്തിന്റെ വലിയ പ്രചാരണം നടന്നുവരികയാണ്. കക്ഷി രാഷ്ട്രീയത്തിനതീതമായി ജനം ഇതില് പങ്കെടുക്കുന്നു എന്നതാണ് സവിശേഷത. വിലക്ക് കല്പ്പിച്ച പാര്ടികളുടെ സാധാരണ ജനങ്ങള് ഈ പരിപാടിയില് ആവേശത്തോടെ പങ്കടുക്കുന്നു എന്നതാണ് പലസ്തീന് ഐക്യദാര്ഢ്യത്തിന്റെ പ്രധാന പ്രത്യേകത. സാര്വദേശീയ ഐക്യദാര്ഢ്യം തന്നെയാണ് സിപിഐ എം മുന്നോട്ടുവയ്ക്കുന്നത്. ഏത് മുന്നണിയില് നില്ക്കുന്നവര്ക്കും ഒരുമിച്ചുചേര്ന്ന് മുന്നോട്ടുപോകാവുന്നതാണത്.
വര്ഗീയവാദികളേയും കോണ്ഗ്രസിനേയും മാത്രമെ ഒഴിച്ചുനിര്ത്തിയിട്ടുള്ളു. സഹകരണ മേഖലയില് കക്ഷിരാഷ്ട്രീയത്തിനപ്പുറത്ത് സഹകരിക്കുന്നവരെയെല്ലാം സഹകരിപ്പിച്ച്; കേന്ദ്രസര്ക്കാര് സഹകരണ മേഖലയെ തകര്ക്കുന്നതിനെതിരെ എല്ലാവരേയും ചേര്ത്ത് മുന്നോട്ടുകൊണ്ടുപോകുന്ന രീതിയാണ് കൈകൊള്ളുന്നത്. വലിയ രീതിയില് ഓരോ ജില്ലയിലും അത് നടന്നുവരികയാണ്.
മനുഷ്യ സമൂഹത്തോട് മുഴുവന് പ്രണയമുള്ളവരാണ് മാര്ക്സിസ്റ്റുകാര്. അല്ലാതെ ഏതെങ്കിലുമൊരു മതക്കാരോടോ വിഭാഗക്കാരോടോ ജാതിക്കാരോടോ പ്രത്യേകം മമതയോ ശത്രുതയോ ഇല്ല. രാജ്യത്തിന്റെ സമ്പത്ത് മുഴുവന് കൊള്ളയടിക്കുന്ന ഒരു ശതമാനം വരുന്നവരാണ് രാജ്യത്തിന്റെ പരമശത്രു. ബാക്കിയുള്ളവരോട് ഐക്യപ്പെടുന്നതിനോട് ഒരുമടിയുമില്ല. മറിയക്കുട്ടി വിഷയത്തില് തെറ്റ് വന്നപ്പോള് പരസ്യമായി ഖേദം പ്രകടിപ്പിച്ചു, അതാണ് ദേശാഭിമാനി. മറ്റേതെങ്കിലും പത്രം ഇത് ചെയ്തോ. തെറ്റ് പറ്റിയാല് തെറ്റുപറ്റി എന്നുപറഞ്ഞ് തിരുത്തിയിട്ടുണ്ട്.
