1999ൽ പാസാക്കിയ നിയമവും തുടർന്ന് കഴിഞ്ഞ സർക്കാരുകളുടെ കാലത്ത് പാസാക്കിയ ഭേദഗതികളും പ്രകാരം സ്ഥിരം ലൈസൻസ് നൽകുന്നതിലുള്ള പ്രായോഗിക തടസ്സങ്ങൾ ഇല്ലാതാക്കാൻ വ്യവസ്ഥകളുണ്ട്. ചീഫ് സെക്രട്ടറി അധ്യക്ഷനായ സംസ്ഥാനതല സമിതിയും കലക്ടർ അധ്യക്ഷനായ ജില്ലാതല സമിതിയും ഏകജാലക സംവിധാനങ്ങളാണ്. സരൾ നിയമത്തിലും ഇതേ സമിതിയാണ്. രണ്ടു നിയമവും ഇപ്പോൾ പ്രാബല്യത്തിലുമുണ്ട്. നിലവിലുള്ള നിയമത്തിൽ 15 കോടി രൂപ വരെയുള്ള നിക്ഷേപങ്ങൾക്ക് ജില്ലാതല സമിതിയും അതിനുമുകളിലുള്ളതിന് സംസ്ഥാനതല സമിതിയുമാണ്. സരൾ നിയമം 25 കോടി രൂപയ്ക്ക് മുകളിലുള്ള നിക്ഷേപങ്ങൾക്ക് മാത്രമാണ്. അപ്പോൾ 15 കോടിക്കും 25 കോടിക്കും ഇടയിലുള്ള നിക്ഷേപങ്ങൾ പരിശോധിക്കാൻ ഒരു സമിതിയുമില്ലാതാകും. നിലവിലുള്ള നിയമത്തിൽ ഏകജാലക സമിതിയുടെ തീരുമാനങ്ങൾ 30 ദിവസത്തിനുള്ളിൽ നടപ്പാക്കാതിരുന്നാൽ അനുമതി ലഭിച്ചതായി പരിഗണിക്കുന്ന ഡീംഡ് വ്യവസ്ഥയുണ്ട്, സരൾ നിയമത്തിൽ ഡീംഡ് വ്യവസ്ഥയില്ല. ഒരേസമയം പ്രാബല്യത്തിലുള്ള രണ്ടു നിയമത്തിൽ ഒരേ കാര്യത്തിന് രണ്ടു വ്യവസ്ഥയാണെന്നർഥം.
