ഗവർണറുടെ സ്വന്തം 'ബിജെപി ഇതര' മുഖ്യമന്ത്രി!
ബിജെപി സംസ്ഥാന പ്രസിഡന്റിന്റെയും എൻഡിഎ കൺവീനറുടെയും വകയായി ഒന്നിനു പുറകെ ഒന്നായി പുഷ്പവൃഷ്ടി! പോരാത്തതിന് ആർഎസ്എസ് മുഖപത്രമായ 'ഓർഗനൈസർ' വക സ്പെഷ്യൽ അഭിനന്ദനപ്പൂച്ചെണ്ടുകൾ വേറെയും! വെറും ഒരു മാസത്തിനിടയിലാണ് ഈ ഭാഗ്യവാന് ഇത്രയേറെ സൽക്കാരങ്ങൾ ഏറ്റുവാങ്ങാൻ യോഗമുണ്ടായത്.
ബിജെപിയുടെ തിരഞ്ഞെടുപ്പ് പ്രകടനപത്രികയിലെ മുന്തിയ ഇനങ്ങൾ അപ്പാടെ പകർത്തിയെഴുതി ഗവർണറുടെ നയപ്രഖ്യാപനത്തിലും ധവളപത്രത്തിലും തിരുകിക്കയറ്റിയ ആ 'അസാധ്യ കരവിരുതിനാണ്' ഈ അഭിനന്ദന പ്രവാഹമത്രയും!
ഭരണഘടനയൊക്കെ വഴിമാറി നിൽക്കട്ടെ; മുഖ്യമന്ത്രി പോലുമറിയാതെ സർക്കാർ ജീവനക്കാരുടെ രഹസ്യയോഗം വിളിച്ചുകൂട്ടാനും, സർവകലാശാലകളിൽ വിസിമാരായി സംഘപരിവാർ നേതാക്കളെത്തന്നെ ചുവപ്പുനാടയില്ലാതെ നിയമിക്കാനും മടിയില്ലാത്ത ഒരു ഗവർണറാണ് നാടു ഭരിക്കുന്നത്. ആ ഗവർണറുടെ കീഴിൽ, അദ്ദേഹത്തിന് ഏറ്റവും പ്രിയപ്പെട്ട 'ബിജെപി ഇതര' മുഖ്യമന്ത്രിയായി വാഴാനുള്ള അപൂർവ സൗഭാഗ്യമാണ് ഇപ്പോൾ നമ്മുടെ മുഖ്യമന്ത്രിക്ക് സിദ്ധിച്ചിരിക്കുന്നത്! അത്രയ്ക്ക് മനോഹരമാണ് ഈ അന്തർധാര!
