സാമൂഹ്യനീതി ഉറപ്പാക്കുക.. ജെ.എൻ.യുവിൽ സംവരണം അട്ടിമറിക്കാനുള്ള നീക്കം ഉടൻ അവസാനിപ്പിക്കുക.
ജെ.എൻ.യു വിൽ 2026-2027 അധ്യയന വർഷത്തെ പിഎച്ച്ഡി പ്രവേശനത്തിൽ പട്ടികജാതി, പട്ടികവർഗ, ഭിന്നശേഷി വിഭാഗങ്ങൾക്ക് അർഹമായ സംവരണം അട്ടിമറിച്ചുകൊണ്ട് സർവകലാശാല അധികൃതർ നടത്തിയിരിക്കുന്ന നീക്കം ഭരണഘടനയോടുള്ള വെല്ലുവിളിയും കടുത്ത വഞ്ചനയുമാണ്. ഉന്നത വിദ്യാഭ്യാസ മേഖലയിൽ നിന്ന് പാർശ്വവൽക്കരിക്കപ്പെട്ട ജനവിഭാഗങ്ങളെ പൂർണ്ണമായും ഒഴിവാക്കാനുള്ള ആസൂത്രിതമായ ഗൂഢാലോചനയാണ് ഈ പ്രോസ്പെക്ടസിലൂടെ പുറത്തുവന്നിരിക്കുന്നത്.
ഭരണഘടനാപരമായ സംവരണ തത്വങ്ങളെ നോക്കുകുത്തിയാക്കി കണക്കുകളിൽ കൃത്രിമം കാട്ടിയിരിക്കുന്ന അധികാരികൾ, പട്ടികവർഗ വിഭാഗത്തിന് 7.5% സംവരണം പ്രകാരം ലഭിക്കേണ്ട 53 സീറ്റുകളിൽ വെറും 38 എണ്ണവും, 15% സംവരണമനുസരിച്ച് 107 സീറ്റ് ലഭിക്കേണ്ട പട്ടികജാതി വിഭാഗത്തിന് വെറും 103 സീറ്റുകളും മാത്രമാണ് നൽകിയിരിക്കുന്നത്. ഇതിനുപുറമെ, 5% സംവരണം അനുസരിച്ച് ഭിന്നശേഷി വിഭാഗക്കാർക്ക് 36 സീറ്റുകൾ ലഭിക്കേണ്ട സ്ഥാനത്ത് വെറും 17 സീറ്റുകൾ മാത്രമായി ചുരുക്കിയിരിക്കുകയാണ്.
ഇന്ത്യയിലെ ഉന്നത വിദ്യാഭ്യാസ സ്ഥാപനങ്ങളിൽ ദളിത്, ആദിവാസി, പിന്നാക്ക, ഭിന്നശേഷി വിഭാഗങ്ങൾക്ക് ലഭിക്കേണ്ട പ്രാതിനിധ്യം ഇല്ലാതാക്കാൻ സംഘപരിവാർ ശക്തികൾ നടത്തുന്ന നീക്കങ്ങളുടെ ഒടുവിലത്തെ ഉദാഹരണമാണിത്.
ഈ ഗുരുതരമായ ഭരണഘടനാ ലംഘനത്തിനെതിരെ ഉടൻ ഇടപെടണമെന്നും, തടഞ്ഞുവെച്ച മുഴുവൻ സംവരണ സീറ്റുകളും പുനഃസ്ഥാപിച്ച് പുതിയ പ്രോസ്പെക്ടസ് ഇറക്കാൻ ജെ.എൻ.യു അധികൃതർക്ക് നിർദ്ദേശം നൽകണമെന്നും ആവശ്യപ്പെട്ട് കേന്ദ്ര വിദ്യാഭ്യാസ മന്ത്രി പ്രഹ്ലാദ് ജോഷിക്ക് ഔദ്യോഗികമായി കത്തയച്ചിട്ടുണ്ട്.
കേന്ദ്ര സർക്കാരും ജെ.എൻ.യു ഭരണകൂടവും ഉടൻ തന്നെ ഈ വിവേചനപരമായ പ്രോസ്പെക്ടസ് തിരുത്താൻ തയാറാകണം. സാമൂഹ്യനീതി അട്ടിമറിക്കാനുള്ള നീക്കത്തിനെതിരെ ശക്തമായ പ്രതിഷേധം ഉയർന്നു വരേണ്ടതുണ്ട്.
