ആദിവാസി ക്ഷേമത്തിലും ആരോഗ്യവകുപ്പിന്റെ എരണംകെട്ട ഭരണം.
നാലു മാസത്തിനിടയിൽ 10 പിഞ്ചുകുഞ്ഞുങ്ങളുടെ ജീവനെടുത്ത ആരോഗ്യവകുപ്പ്, ആദിവാസി ക്ഷേമത്തിലും എരണംകെട്ട ഭരണമാണെന്ന് തെളിയിച്ചു. ആദിവാസി ഗ്രാമമായി അറിയപ്പെടുന്ന പാലക്കാട് ജില്ലയിലെ അട്ടപ്പാടിയിൽ പ്രത്യേക ശ്രദ്ധ ആരോഗ്യമേഖലയിലടക്കം എല്ലാ രംഗങ്ങളിലും എൽ.ഡി.എഫ്. ഭരണത്തിൽ ഉണ്ടായിരുന്നു.
യു.ഡി.എഫ്. വന്നതോടെ സ്ഥിതി മാറി. ആവശ്യമായ ആരോഗ്യ പ്രവർത്തകരില്ല. 7 ജൂനിയർ പബ്ലിക് ഹെൽത്ത് നേഴ്‌സുമാരെയും മൊബൈൽ ലാബിലെ ഫാർമസിസ്റ്റിനെയും സ്ഥലം മാറ്റിയപ്പോൾ പകരം ആരെയും നിയമിച്ചിട്ടില്ല. മൊബൈൽ ക്ലിനിക്ക് നിർത്തലാക്കി. ഗർഭിണികളുടെയും കുട്ടികളുടെയും പരിചരണം ഇല്ലാതായി. മരുന്ന് വിതരണം നിലച്ചു. 24 മെന്റർ അധ്യാപകരെ പിരിച്ചുവിട്ടു. ഊരുകളിൽ ആരോഗ്യപ്രവർത്തകർക്ക് യാത്ര ചെയ്യാനുള്ള ജീപ്പ് സർവീസ് നിർത്തലാക്കി. ആവശ്യമായ പോഷകാഹാരവും പരിചരണവും ഇല്ലാത്തതിനാൽ 10-ഉം 15-ഉം ദിവസം മാത്രം പ്രായമുള്ള കുഞ്ഞുങ്ങൾ മരിക്കാൻ തുടങ്ങി. എന്നിട്ടും സർക്കാർ അനങ്ങിയില്ല.
ഗർഭിണികളുടെ പരിചരണം നിലച്ചതോടെ ശസ്ത്രക്രിയയിലൂടെ ലഭിക്കുന്നത് ചേതനയറ്റ കുഞ്ഞുങ്ങളായി മാറി. മൂന്നു മാസം മുതൽ ഒന്നര വയസ്സു വരെയുള്ള കുട്ടികൾക്ക് എൽ.ഡി.എഫ്. സർക്കാർ നൽകിയിരുന്ന പ്രതിമാസ സഹായധനമായ 2000 രൂപ യു.ഡി.എഫ്. അധികാരത്തിൽ വന്നതോടെ നിർത്തലാക്കി. എരണംകെട്ടവരുടെ ഭരണത്തിൽ ആദിവാസി കുഞ്ഞുങ്ങൾ മരിച്ചുവീഴുന്നു. ആരോഗ്യമന്ത്രിയും മുഖ്യമന്ത്രിയും ഗീർവാണ പ്രസംഗം നടത്തുന്നു.
