സീതാറാം യെച്ചൂരി

ആമുഖം

ചരിത്രം

തെരഞ്ഞെടുപ്പു ചരിത്രം

സീതാറാം യെച്ചൂരി

സീതാറാം യച്ചൂരി

1952 ആഗസ്റ്റ്‌ മാസം 12-ാം തീയതി ജനിച്ചു.
ആന്ധ്രാപ്രദേശിലെ ഹൈദരാബാദില്‍ സ്‌ക്കൂള്‍ വിദ്യാഭ്യാസത്തിന്‌ ശേഷം, തെലുങ്കാന സമരത്തെത്തുടര്‍ന്ന്‌ വിദ്യാഭ്യാസം തടസ്സപ്പെട്ടപ്പോള്‍ ദില്ലിയിലേയ്‌ക്ക്‌ മാറി. 1970-ല്‍ അഖിലേന്ത്യാ തലത്തില്‍ ഒന്നാം സ്ഥാനത്തോടെ ഹയര്‍ സെക്കന്‍ഡറി പഠനം പൂര്‍ത്തിയാക്കി.
1973-ല്‍ ദില്ലി സെയ്‌ന്റ്‌ സ്റ്റീഫന്‍ കോളേജില്‍ നിന്ന്‌ സാമ്പത്തിക ശാസ്‌ത്രത്തില്‍ ഒന്നാം ക്ലാസ്സോടെ ബിരുദം കരസ്ഥമാക്കി.
1975-ല്‍ പ്രശസ്ഥമായ ദില്ലി ജവഹര്‍ലാല്‍ നെഹ്‌റു സര്‍വ്വകലാശാലയില്‍ നിന്നും സാമ്പത്തിക ശാസ്‌ത്രത്തില്‍ ഒന്നാം ക്ലാസ്സോടെ തന്നെ ബിരുദാനന്തരബിരുദവും നേടി. അവിടെ തന്നെ ഡോക്‌ടറല്‍ ഗവേഷണത്തിന്‌ ചേര്‍ന്നെങ്കിലും അടിയന്തിരാവസ്ഥകാലത്ത്‌ അറസ്റ്റ്‌ ചെയ്യപ്പെട്ടതോടെ ഗവേഷണപ്രവര്‍ത്തനം പൂര്‍ത്തിയാക്കാന്‍ കഴിഞ്ഞില്ല.
ജവഹര്‍ലാല്‍ നെഹ്‌റു സര്‍വ്വകലാശാല വിദ്യാര്‍ത്ഥിയായിരിക്കെ 1974-ല്‍ എസ്‌.എഫ്‌.ഐ അംഗമായി. 1975-ല്‍ സി.പി.ഐ.(എം) അംഗമായി. അടിയന്തിരാവസ്ഥാ കാലഘട്ടങ്ങളില്‍ കുറെക്കാലം ഒളിവില്‍ പ്രവര്‍ത്തിക്കുകയും 1975-ല്‍ അറസ്റ്റ്‌ ചെയ്യപ്പെടുകയും ചെയ്‌തു. അടിയന്തിരാവസ്ഥയ്‌ക്ക്‌ ശേഷം ദില്ലി ജവഹര്‍ലാല്‍ നെഹ്‌റു സര്‍വ്വകലാശാല വിദ്യാര്‍ത്ഥി യൂണിയന്‍ പ്രസിഡന്റായി തെരഞ്ഞെടുക്കപ്പെട്ടു. (1977-78).
1978-ല്‍ എസ്‌.എഫ്‌.ഐ-യുടെ അഖിലേന്ത്യാ ജോയിന്റ്‌ സെക്രട്ടറിയും പിന്നീട്‌ പ്രസിഡന്റുമായി. 1984-ല്‍ സി.പി.ഐ.(എം) കേന്ദ്രകമ്മിറ്റിയിലേയ്‌ക്ക്‌ ക്ഷണിക്കപ്പെട്ടു. തുടര്‍ന്ന്‌ 1985-ല്‍ നടന്ന 12-ാം പാര്‍ട്ടി കോണ്‍ഗ്രസില്‍ കേന്ദ്രകമ്മിറ്റിയിലേയ്‌ക്ക്‌ തെരഞ്ഞെടുക്കപ്പെടുകയും 1988-ല്‍ നടന്ന 13-ാം പാര്‍ട്ടി കോണ്‍ഗ്രസില്‍ കേന്ദ്ര സെക്രട്ടറിയേറ്റ്‌ അംഗമായി തെരഞ്ഞെടുക്കപ്പെട്ടു.
1992-ല്‍ സി.പി.ഐ(എം) പോളിറ്റ്‌ബ്യൂറോ അംഗമായി. ഇപ്പോള്‍ പാര്‍ട്ടി പോളിറ്റ്‌ബ്യൂറോ അംഗവും അന്തര്‍ദേശീയ വിഭാഗത്തിന്റെ മേധാവിയായും പ്രവര്‍ത്തിക്കുന്നു. സി.പി.ഐ.(എം) കേന്ദ്രകമ്മറ്റി പ്രസിദ്ധീകരണമായ 'പീപ്പിള്‍സ്‌ ഡെമോക്രാസി'യുടെ എഡിറ്ററാണ്‌ സ: യച്ചൂരി.